Sælir pungar

Sælir drengir, stúlkur og aðrir minna þroskaðir menn

Sælir,

ég var að fá þær fréttir að leikurinn við Kompás frestaðist um einn dag og fer fram miðvikudaginn 18.ágúst kl 19:30. ATH HANN ER EINNIG HÁLFTÍMA FYRR EN LEIKIRNIR HINGAÐ TIL.
Þetta er vegna þess að tvö lið eru jöfn að stigum og við erum að keppa við annað þeirra. Ákveðið var að leikirnir færu fram á sama tíma.

kveðja
Þjálfarinn

Í síðustu viku átti Ástríkur leik við söngfuglana í Bambóleó. Voru þar saman komnir liðsmenn Ástríks, fyrrverandi liðsmenn Ástríks, ólöglegir liðsmenn Ástríks og ekki liðsmenn Ástríks.

Ástríkur byrjaði með hefðbundnum hætti ársins 2010 með því að gefa mótherjunum tvö mörk. Girtu Ástríksmenn sig þá í brók og hófu leik töluvert á eftir andstæðingunum. Þéttist vörnin með Finni og Jón Þóri í fararbroddi. Framar á vellinum var sjóarinn Ninnó eins og kóngur og dreifði boltanum í fætur liðsmanna sinna sem hlupu hraðar en myndavélarnar réðu við. Áttu Björn Bragi, Doddi og Einar tvíburi hvern sprettinn á fætur öðrum og gerðu mikinn usla í vörn Bambóleó. Væri 4x100 metra sveit Íslands framar öðrum liðum með þremenningunum innan borðs. Uppskáru Ástríksmenn að lokum mark í fjörugum fyrri hálfleik sem endaði 2-1 fyrir gestina.

Seinni hálfleikur var ekki síður skemmtilegur og var krafturinn í spretthlaupurunum síst að dvína og jafnaðist leikurinn fljótlega. Sóttu Bambóleó mest um vinstri kantinn í síðari hálfleik sem voru mikil mistök hjá þeim því þar var fyrir Smári sem stöðvaði flestar þeirra sóknir og dreifði honum í spil í góðu samstarfi við varnartröllin Finn og Jón Þór. Fór þó svo á endanum að Bambóleó skoraði sitt þriðja mark. Fengu Ástríksmenn fjölmörg færi í síðari hálfleik. Átti Eyþór lánsmaður frá liðinu hans Steina góðan leik á vinstri kanti og Sindri lánsmaður frá Bambóleó var afar sprækur í leiknum. Ninnó átti m.a. eftirminnilegt skot að marki eftir draumasendingu fyrir framan teginn, hljóp í hálfhring og skaut eins langt framhjá og honum var unnt, einkar eftirminnileg tilþrif. Á endanum jafnaði Ástríkur leikinn 3-3. Fór nú að bera á þreytu á miðjunni hjá Ástríki og færðist við það aukinn þungi í sóknir Bambóleó sem skoruðu sitt fjórða mark.

Ekki voru allir á því að gefast upp og upphófst nú ein glæsilegasta sókn í sögu Ástríks. Spiluðu Einar og Eyþór upp vinstri kant sendu hælspyrnu á Stein sem óð á skítugum skónum inn í teig í gegnum þrjá varnarmen og sendi boltann í fætur Ninnó (ef ég man rétt) sem dró að sér varnarmann og sendi hann áfram á næsta mann sem dró að sér varnarmann og sendi hann áfram á Björn Braga sem var orðinn einn og óvaldaður fyrir framan markið, fékk nægan tíma til að athafna sig skrapp í kaffi og kleinur og sendi svo
boltann kurteisislega í mark andstæðinganna.

Ekki vildu liðin una við jafntefli í þessum skemmtilega leik og ákváðu að útkljá málið í vító. Þar sýndu Ástríksmenn styrk sinn og skoruðu úr öllum sínum spyrnum af miklu öryggi en Ingvar markmaður frá liðinu hans Steina var hetja Ástríks, átti góðan leik og innsiglaði frammistöðu sína með því að verja eina vítaspyrnu Bambóleó sem nægði þeim Ástríki til sigurs. Leikururinn var hin mesta skemmtun og var ánægjulegt að sjá gamla félaga njóta sín sem hafa ekki getað tekið þátt í leikju liðsins í sumar.

Við þökkum Bambóleó fyrir skemmtilegan og drengilegan leik og lán á liðsmönnum sínum. Ekki má heldur gleyma dómaranum sem sinnir mikilvægasta starfinu á vellinum en hann fær mínar bestu þakkir fyrir leikinn.

kveðja
Þjálfarinn

Æfingar á Fylkisvelli falla niður það sem eftir lifir ágústmánaðar. Ástæðan fyrir þessu er annars vegar sú að fáir voru að mæta og erfiðlega hefur gengið að rukka fyrir deild og æfingar í sumar en við þurfum að greiða fyrir afnot af vellinum. Það verða því ekki frekari æfingar fyrr á mínum vegum fyrr en þau mál eru komin í lag.

kveðja
Þjálfarinn

Sælir,

eins og komið hefur fram á heimasíðu Sunnlensku deildarinnar er lið KH hætt í deildinni og fáum við því þrjú stig úr þeim leik. Leikurinn 11.ágúst fellur því niður.

Þess í stað verður æfingaleikur við hið skemmtilega lið Bambóleó á sunnudaginn 8.ágúst kl 19:00. Ég mun ekki setja hóp á netið heldur vonast ég eftir sem flestum á leikinn enda vænti ég þess að einhverjir hafi gott af því að hlaupa aðeins af sér eftir góða verslunarmannahelgi

kveðja
Þjálfarinn

Já, það er æfing í kvöld í sól og sumaryl. Gott að svitna í fótbolta fyrir verslunarmannahelgi, það lætur manni líða betur þegar bjórinn er opnaður.

Sælir drengir

Nú er kominn tími til að þétta raðirnar því við mætum annað kvöld alvöru liði. Sem kunnugt er mættum við Biskup í bikarnum og var það hörkuleikur.
Ég læt ekki upp nöfn þeirra sem fá að spila heldur vil ég fá alla í hópnum til að mæta sem eiga heimangengt. Ástríkur er búinn að vera iðinn á markaðnum undanfarið og skyldi engan undra þegar nöfn eins og Henry, Pyol og Vidic láta sjá sig annað kvöld.

kveðja
Þjálfarinn

Sælir pungar,

í dag fimmtudaginn 15.júlí keppum við við Liðið hans Steina. Leikið verður kl 20:00 á Eyrarbakka. Eftirfarandi leikmenn geta búist við að spila:

Gummi
Valdi
Finnur
Jón Rúnar
Elli
Aron
Bjarki
Nunni
Björn Bragi
Hannes
Egill
Tommi
Óskar
Dubbi
Eyþór
Jón Hilmar
Kristján
Svanur
Leifur

kveðja
Þjálfarinn

Næsti leikur í hjá okkur er við lið í einkaeigu, Liðið hans Steina. Sá leikur verður næsta fimmtudag 15. júlí kl. 20:00, á Eyrarbakka.

Laugardagurinn 10.júlí er dagurinn. Dagurinn sem Ástríkur ferðast austur fyrir ösku og eldfjöll, sanda og svamlandi stórfljót til að mæta grönnum okkar í Vík í Mýrdal. Álög eru á Ástríki gagnvart Drangi en okkar ágæta lið hefur aldrei unnið fjörudrangana. Nú verður breyting á eða eins og Dexter orðaði það, "tonight is the night".
Allir sem eru löglegir með Ástríkir eru velkomnir í þennan leik og leggja sitt á vogarskálarnar að sigra drangana ósigrandi. Sá sem verður valinn maður leiksins verður krýndur "The Gladiator" fyrir að leggja sjó og sandþursa í hringleikahúsi Drangverja og hlýtur að launum bjór frá þjálfaranum.

kveðja
Þjálfarinn

Sælir drengir og fólk

Ferðin á Vík er næst á dagskrá en það er að sjálf sögðu hápunktur sumarsins þar sem það er tekið vel á því og við gerðir útlægir úr bænum í heilt ár á eftir þegar átök kvöldsins og næturinnar hafa gengið um garð. Þeir eru svo ánægðir að fá alvöru skemmtileg lið eins og okkur þarna fyrir austan að þeir vilja allt fyrir okkur gera. Ég kannaði því ýmistlegt nauðsynlegt og fékk þessi fínu svör til baka frá þeim. Ég á eftir að hringja í tjaldstæðið og kanna verð á því. Ég reikna með að flestir borði meðan þeir horfa á leikinn um 3. sætið á HM en ef einhverjir vilja grilla verða þeir að gera ráðstafanir sjálfir.

Menn verða að leggja tímanlega af stað, komnir ekki seinna en 30 mín. fyrir leik. Það tekur ca. 2 - 2 1/2 klst að keyra frá Rauðavatni og á Vík, svo gott er að leggja af stað á hádegi. Og endilega tala sig saman með far! Leikurinn verður búinn ca. 17:00 og þá er 1 1/2 klst til að fara í pottinn í sundlauginni, tjalda og annað shit sem menn gætu þurft að gera áður en HM-leikurinn byrjar. Það er í fínu lagi að taka konur og félaga tengda Ástríki með í Vík, bara skemmtilegra að hafa stærri hóp. Set inn meira um ferðina á morgun.

Svör frá Drangsmönnum

Við erum nú alltaf til í að leyfa ykkur ráða hvenær leikurinn vegna þess
hversu duglegir þið eruð að djamma hérna eftir leikina, þannig að kl 15:00
hljómar bara ágætlega fyrir okkur og höfum við búningsklefa í
íþróttamiðstöðinni, sundlaugin er opinn til kl 19:00 og kostar 300 kall í
hana.

Hægt er að horfa á leikinn (Úrúgvæ-Þýskaland) á Halldórskaffi sem er staðsettur vestast í
bænum og býður hann uppá mat gegn vægu gjaldi, enda styrkir þessi staður
okkur í deildinni gegn því að liðin éti hjá þeim

Tjaldstæðið er opið og er í fínu standi og maður hefur ekki orðið var við
hana (öskuna) í langan langan tíma. Ég er ekki nógu fróður um grill aðstöðu eða
verðskrá hjá þeim en síminn þar er 487-1345.

Ég held að það sé ekkert ball hérna núna þessa helgina en pöbbinn er opinn eitthvað fram á nótt. (sent stuttu seinna) Það er trúbador á kaffinu hér á laugardagskvöldið, þannig að það verður hér fjör og komu ykkar fagnað í bæinn fagra

Já Hörkukvendið (Henný rauðhærða vinkona okkar) verður á staðnum og örugglega í banastuði, hún spilaði síðasta leik hjá okkur og þótti standa sig býsna vel, hún mætir bara enn einbeittari í næsta leik, versta er að ég held að það sé ekki hægt að
stilla henni upp í byrjunarliðið því hún myndi pottþétt fá rautt spjald á
90 mín.

Annars verður bara gaman að fá ykkur og endilega spurðu bara ef einhverjar
spurningar vakna.

kv. Ágúst

Næsti leikur er fimmtudaginn 8.júlí á móti Börnum Náttúrunnar og fer leikurinn fram með ströndum suðurlands. Leikurinn er auglýstur á Stokkseyri en það er verið að reyna að færa leikinn á Eyrarbakka þannig að vistmenn Litla Hrauns geti betur fylgst með. Það verður engin hætta á að fólk fái fráhvarseinkenni frá HM þar sem þessi leikur á eftir að bjóða upp á allt það besta sem hefur sést þaðan.

Leikmennirnir í þessum leik eru eftirfarandi dreift á tilviljunarkenndan hátt:

Bjarki
Dubbi
Eyþór
Nunni
Gummi
Jón Þór
Valdi
Jón Rúnar
Kristján
Björn Bragi
Aron
Valli
Svanur
Steinn
Finnur
Elli
Tommi
Jón Hilmar

Kveðja
Þjálfarinn

Sælt þið fólk